एक पत्र जुकरबर्गलाई !

प्रिय जुकरबर्ग ,

नमस्कार !

चिठ्ठी पठाउँ ठेगाना थाहा छैन, ईमेल गरौ भनेको त्यो आईडि नि छैन ! हुलाकलाई ईमेलले बिस्थापित गरिदियो , अब ईमेललाई तिम्ले बनाको भित्तोले बिस्थापित गर्दै छ! त्यही भएर तिम्रै भित्तोमा लेखेर पठाउने बिचार गरे!

वाट्स अन योर माइन्ड भनेर तिम्रो स्ट्याटस सोध्ने वाला छैन म , तिम्रो दीमागी ढोकाको ताल्चा खोल्न चाहन्न! एउटा ब्यक्तिको दिमागमा के हुन्छ त्यो सबैलाई सर्वबिदित नै छ - नाम, दाम, माम अनी चाहनाका अबिरल लाम ! दिमागमा जे भये नि गुदि कुरो त्यही हो! त्यही हुनाले सर्वप्रथम “वाट्स अन योर माइन्ड” भन्ने तिम्रो प्रश्न गलत चै छैन भन्दिन तर कुनै औचित्य पनि छैन !

फोटो धुलाएर एल्बममा राख्न कम्ता झन्जट हुँदैनथ्यो ! तिम्ले बनाइदेको यो ५ इन्चीको भित्तोमा जती फोटो टांसे नि नभरिने ! त्यो झन्जट सदाको लागि पार लाइदेकोमा धन्यवाद दिनै पर्छ! फलानीले छोरो पाइछे भनेर सुनाको एउटालाई – “अँ ! अहिले फेसबुकमै हुर्काइरहेछे रे , देख्दिनस घाममा तेल लाको फोटो दिनका दिन अप्लोड गरेकी रे !”

बिर्सिएका पुराना सम्बन्धहरुलाई पुनर्जिवित गर्ने यो भित्ताको छमता चै अदभुत छ! कतीको सम्बन्ध यही भित्तो मार्फत जोडीये, कतिको इँगेज्मेन्ट अनी बिहे समेत् जुराइदेको छौ तिमीले ! तिम्रो यो बहुप्रतिभालाई मान्नै पर्छ ! सँगसंगै फेरी जोडीएको सम्बन्ध एकैछिनमा तोड्ने शक्ती नि तिमीसंगै छ ! “इन अ रिलेसन्शिप” लेख्न नपाई मिनेट पछी नै झ्याप्पै “सिंगल” हुन्छन! रिलेसन्सिप स्ट्याटस चाइनिज सामान भन्दा नि सस्तो बनाइदिएउ तिमीले!

सडक छेउको भित्तो र तिम्ले बनाको यो भित्तोमा खासै अन्तर देख्दिन म ! हिरो, हिरोनी, फिलिमका पोस्टर् उता नि टास्थे यता नि टासेकै छन, नेताका टाउका अनी नारा उता नि लेखिन्थे यता नि लेखिएकै छन! भोट् माग्न घर घर धाउन नि नपर्ने भो अब! एक लाइकको भरमा घर बसी बसी भोट् हाल्न पाइने ! अब खिलराजलाई भनेर सँविधान्सभा को चुनाव नि यसै मार्फत गराउनु पर्ला!

पैतालामा काँडा बिझे जस्तै गरी मन्दिर जान अल्छि गर्नेहरुलाई ओच्छ्यानबाटै प्रभुको दर्शन गर्ने मौका मिलाइदेकोमा तिम्लाई फेरी धन्यवाद दिनै पर्छ! बिना कस्ट यती सजिलै पाप पखाल्न पाएपछी मान्छेहरु रातारात धर्मभिरु भएका छन , एक लाइकका साथ एक र कमेन्टका साथ २-४ पाप एकैचोटि पखाल्न थालेका छन!

सुन्छु तिम्ले कलेज् बँक गरेर यो फेस्बुक भन्ने जिनिस बनाको रे ! हाम्रा भाईबहिनीहरु नि स्कुल कलेज् हापेर बिन्दास मिहिनेत गर्छन् तर खोइ कसैले आजसम्म एउटा सियो धरी बनाका छैनन! फेरी तिमीले त सेयर नि निकालेका छौ रे न्युयोर्कको स्टक एक्स्चेन्जमा, डलरका डलर लाभांस् कमाउँदै छौ रे ! दिनमा ७-८ घण्टा फेस्बुकमा खटेर बिताउने हामीले, केवल १५-२० लाइक्स र कमेन्ट मै चित्त बुझाउने ! केही लाभांस् पाउने कि नपाउने हँ ?